Mirë se vini në Hartën Digjitale të Internimit dhe Izolimit

Kjo hartë digjitale është krijuar për të dokumentuar dhe bërë të aksesueshme vendet e internimit në Myzeqenë e Madhe gjatë regjimit komunist në Shqipëri.
Në fillim të viteve 1950, Myzeqeja dhe veçanërisht Lushnja u shndërrua në qendrën më të madhe të sistemit të internimit politik në Shqipëri. Kampet e Savrës, Plugut dhe Gjazës, së bashku me Burgun e Grave, formuan një ekosistem të organizuar shtypjeje ku internimi, puna e detyruar, kontrolli administrativ dhe mbikëqyrja nga Sigurimi i Shtetit funksiononin së bashku. Internimi godiste familjen si tërësi dhe ndikonte edhe mbi brezat pasardhës.
'Peizazhe të Izolimit' është një itinerar kujtese që fton vizitorin të kuptojë mekanizmin e represionit komunist dhe të reflektojë mbi lirinë, dinjitetin njerëzor dhe rëndësinë e ruajtjes së kujtesës historike.
Ju ftojmë të eksploroni këtë hartë dhe të bëheni pjesë e ruajtjes së kujtesës historike, sepse çdo vend, çdo dokument dhe çdo dëshmi është një pjesë e historisë sonë të përbashkët.